मुस्ताङ जिल्लाको मुक्तिनाथमा ३२ फिट अग्लो भगवान बुद्धको मुर्ति निर्माणका लागि अमेरिकाको न्युयोर्क निवासी एनआरएनएका क्षेत्रीय उप–संयोजक सोनाम लामाले एक करोड ४० लाख रुपैयाँ सहयोग गर्नु भएको छ ।
ढुंगाबाटमात्र निर्माण हुने भगवान बुद्धको मुर्ति ललितपुरको पाटन औद्योगिक क्षेत्रस्थित ‘अरनिको स्टोन कार्भिङ’ मा कुँद्ने काम भैरहेको छ । निर्माणको जिम्मा लिएको अरनिको स्टोन कार्भिङले करिव ५० प्रतिशत काम सकिसकेको जनाएको छ । हिन्दु र बौद्ध धर्मावलम्बिहरुको संयुक्त तिर्थस्थल रहेको मुक्तिनाथ क्षेत्रमा सन् २०१५ को अक्टोबरसम्ममा मुर्ति स्थापना गरिसक्ने लक्ष्य लिइएको छ । हाल तिब्र गतिमा काम भैरहेको छ भने सामाग्रीहरु ढुवानी गरी आधारस्तम्भ तयार भैसकेको छ ।
सम्पूर्ण लागत तीन करोड रुपैयाँ लाग्ने अनुमान गरिएको उक्त बुद्ध मुर्ति निर्माणको खर्च क्षेत्रीय उप–संयोजक लामाले प्रदान गर्नु भएको हो । यो बाहेक ढुवानी र उक्त क्षेत्रमा निर्माण गरिने बगैचा एवं अन्य निर्माणका लागि अझै एक करोड ६० लाख रुपैयाँ आवश्यक पर्ने भन्दै ‘मुक्तिनाथ क्षेत्र विकास एवं स्थानिय संरक्षण समिति’ ले सहयोगका लागि अपिल गरेको छ ।
प्रस्तावित भगवान बुद्धको मुर्ती
मुक्तिनाथ क्षेत्रमा बुद्धमुर्ति स्थापना गरी लुम्बिनी र मुक्तिनाथलाई संगसंगै लैजाने प्रयास रहेको भन्दै लामाले भन्नुभयो– ‘धामिर्क एवं पर्यटकीय क्षेत्रको रुपमा मुक्तिनाथलाई विकास गरी समग्र मुलुकको अर्थतन्त्रलाई टेवा दिने उद्देश्य अनुरुप आर्थिक सहयोग गरेको हुँ । यसले एकातिर धार्मिक पर्यटकको संख्या बढ्छ भने अर्कोतिर लुम्बिनी र मुक्तिनाथलाई जोड्न सहज हुन्छ ।’
समुद्री सतहदेखि ३७१० मिटरको उचाईमा रहेको मुक्तिनाथ क्षेत्रमा स्थापना हुने यो मुर्ति संसारकै उग्लोस्थानमा अवस्थित ढुंगाबाट निर्मित बुद्ध मुर्ति हुने अनुमान गरिएको छ । यसले पनि पर्यटकको संख्यामा बृद्धि हुने मुक्तिनाथ क्षेत्र विकास एवं स्थानिय संरक्षण समितिले अपेक्षा गरेको छ ।
मुक्तिनाथ क्षेत्रमा ढुंगाको मुर्ति बन्ने भएपछि स्थानीयवासी खुशी भएका छन् । उनीहरुले मुर्ति निर्माणका लागि सहयोग गर्ने लामालाई धन्यवादसमेत दिएका छन् । लामाको जन्मस्थल पनि मुक्तिनाथमै भएकोले आफ्नो क्षेत्रको विकासमा सहयोग गरेकोप्रति स्थानीयले आभारसमेत व्यक्त गरेका छन् ।
निर्मणाधिन् भगवान बुद्धको मुर्ती- मुस्ताङ
EN
NP
